Kryeministrja italiane, Giorgia Meloni, njoftoi se Italia do të marrë pjesë si vend vëzhgues në Bordin e Paqes të presidentit amerikan, Donald Trump, gjatë vizitës së saj në Adis Ababa, Etiopi.

Meloni theksoi se, për arsye kushtetuese, Italia nuk mund të bëhej anëtare e plotë e këtij organi, por pjesëmarrja si vëzhguese konsiderohet një zgjidhje e përshtatshme:

“Duke pasur parasysh të gjithë punën që duhet bërë për të stabilizuar situatën në Lindjen e Mesme, një prani italiane dhe evropiane mbetet e rëndësishme,” deklaroi ajo.

Bordi, i prezantuar nga Trump muajin e kaluar në Forumin Ekonomik Botëror në Davos, ishte fillimisht konceptuar për të mbikëqyrur rindërtimin e Rripit të Gazës, por ambiciet e tij janë zgjeruar dhe Trump ka sugjeruar se mund të përdoret për të adresuar konflikte dhe kriza globale.

Shumë vende evropiane e shohin bordin si një sfidë ndaj Kombeve të Bashkuara dhe kanë refuzuar të bashkohen, ndërsa Bullgaria dhe Hungaria janë vendet e vetme të BE-së që konfirmuan pjesëmarrjen si pjesë e panelit prej 27 vendesh.

Ky rol i Italise si vëzhguese thekson përpjekjen për të ruajtur ndikimin dhe praninë evropiane në vendimmarrje ndërkombëtare, pa u angazhuar si anëtare e plotë.