Policia e Tiranës ka vënë në pranga Erisjaldo Gjuta, 22 vjeç, nipi i Vladimir Gjutës, pas ngjarjes ku një 18-vjeçare u plagos me armë zjarri brenda hotelit të familjes së tyre.

Sipas hetimeve, e reja, e dashura e 22-vjeçarit, dyshohet të ketë qenë vetëplagosur me armën që i përkiste Gjutës, ndërsa pistoleta nuk është gjetur ende. Erisjaldo Gjuta mohon të ketë dijeni për ngjarjen dhe është akuzuar për “Moskallëzim të krimit”, “Veprime që pengojnë zbulimin e së vërtetës” në bashkëpunim dhe “Mbajtje pa leje të armëve shpërthyese dhe municionit”.

Ai ka deklaruar se në momentin e të shtënave ka qenë jashtë me të atin dhe se menjëherë janë ngjitur në dhomë, duke e gjetur të plagosur të dashurën e tij. Fillimisht kanë tentuar të japin ndihmën e parë, por më pas e kanë transportuar në spital, ku ndodhet jashtë rrezikut për jetën.

Një ditë më parë, policia arrestoi edhe nënën dhe xhaxhain e 22-vjeçarit, Mirvete dhe Vladimir Gjuta, ndërsa babai dhe kushëriri i tij, Saimir dhe Elvir Gjuta, janë shpallur në kërkim. Ata akuzohen për moskallëzim të krimit dhe prishje të provave, duke pretenduar të deklaronin se vajza ishte gjetur e shtrirë te rrethi i Ekonomikut.

E reja ka pohuar në deklaratën e saj se ka tentuar të vetëvritej, duke shpjeguar se kishte bërë gabime në jetën e saj. Hetimet vazhdojnë për të sqaruar plotësisht rrethanat e ngjarjes.