Oksana Murasova, 39 vjeç nga Lituania, u arrestua pasi plagosi me thikë partnerin e saj 50-vjeçar në një apartament në veri të Milano. Megjithatë, autoritetet gjyqësore vlerësuan se ajo mund të ketë vepruar në kushtet e vetëmbrojtjes, duke vendosur lirimin e saj.

Sipas raportimeve, ngjarja ndodhi më 15 shkurt. Gruaja ka deklaruar se gjatë një grindjeje ishte goditur me grusht nga partneri. Ajo pretendon se u përpoq të largohej, por ai e ndoqi dhe i zuri rrugën. Në atë moment, sipas dëshmisë së saj, ajo mori një thikë kuzhine dhe e plagosi.

Burime nga hetimi bëjnë me dije se policia kishte ndërhyrë edhe më herët në banesën e çiftit për një episod dhune në familje, por nuk ishte paraqitur kallëzim zyrtar.

Rasti ka rikthyer vëmendjen edhe te e kaluara penale e Murasovës. Ajo ishte dënuar për vrasjen e një partneri tjetër në vitin 2015, po në Milano, me tetë vite burg. Arrestimi i saj u ekzekutua në vitin 2019, pasi vendimi mori formë të prerë. Edhe në atë rast, ajo kishte deklaruar se kishte vepruar pas dhunës së ushtruar ndaj saj.

Prokuroria po vijon hetimet për të sqaruar plotësisht rrethanat e episodit të fundit dhe për të verifikuar nëse janë plotësuar kushtet ligjore të vetëmbrojtjes.