Deputeti i Partisë Demokratike, Agron Gjekmarkaj, ka reaguar me forcë ndaj ndryshimeve të propozuara në Kodin e Procedurës Penale nga kryeministri Edi Rama, duke i cilësuar ato si ndërhyrje brutale që synojnë mbrojtjen politike të zyrtarëve të qeverisë dhe dobësimin e Prokurorisë së Posaçme.

Në një postim në Facebook, Gjekmarkaj thekson se ndryshimet nuk përfaqësojnë reformë, por një përpjekje për të frenuar hetimet dhe për të vendosur kontroll politik mbi institucionet e drejtësisë:

“Ky është një hap i rrezikshëm drejt kapjes së plotë të drejtësisë dhe shkatërrimit të ndarjes së pushteteve, pas panikut që shkaktoi rasti i zëvendëskryeministres Balluku.”

Ai akuzon qeverinë se po përdor ligjin si “mburojë për pushtetin” dhe paralajmëron mobilizim qytetar:

“Qytetarët nuk do ta pranojnë këtë, ndaj më 20 shkurt duhet të vërshojnë në Bulevardin ‘Dëshmorët e Kombit’ për të mbrojtur liritë personale dhe kushtetuese.”

Ndërsa Gjekmarkaj flet për një “puç institucional” dhe paralajmëron rrezikun e kthimit të drejtësisë në vartëse të qeverisë, kryeministri Rama ka prezantuar ndryshimet duke deklaruar se ato mbrojnë funksionarët e qeverisë dhe pezullimin nga detyra, dhe ka kërcënuar se vendimet e tij nuk mund të kundërshtohen nga prokurorët apo gjyqtarët.

Situata ka ndezur tensione politike dhe pritet të përshkallëzohet me protesta në ditët në vijim.