Në emër të Shteteve të Bashkuara të Amerikës, Sekretari Amerikan i Shtetit, Marco Rubio, ka dërguar urime për qytetarët e Kosovës me rastin e 18-vjetorit të Pavarësisë së vendit.

Në mesazhin e publikuar nga Departamenti Amerikan i Shtetit, Rubio thekson se SHBA mbeten të palëkundura në mbështetjen për sovranitetin dhe integritetin territorial të Kosovës dhe shprehet optimist për zgjerimin e lidhjeve ekonomike që do të rrisin prosperitetin e të dyja kombeve.

Po ashtu, Rubio vlerëson rolin e Kosovës në përpjekjet globale të SHBA-së dhe mirëpret udhëheqjen e saj si Anëtare Themeluese e Bordit të Paqes.

“Ndërsa Kosova shënon këtë përvjetor të rëndësishëm, mezi presim një bashkëpunim edhe më të fortë në vitet në vijim. Shtetet e Bashkuara qëndrojnë me Kosovën ndërsa ajo vazhdon të ndërtojë një të ardhme të sigurt dhe të begatë,” përfundon mesazhi i Sekretarit Amerikan të Shtetit.