Një 22-vjeçar shqiptar, Redis Shahini, i deportuar më parë nga Britania e Madhe për kultivim kanabisi, u arrestua sërish pas rikthimit ilegal në vend për të ngritur një tjetër fermë droge me vlerë deri në 200 mijë paund.
Shahini ishte deportuar në vitin 2024 pas gjysmës së dënimit 12-mujor për prodhim kanabisi. Megjithatë, pak muaj më vonë, ai arriti të rikthehej ilegalisht në Britani, me qëllim hapjen e një ferme tjetër në Nottingham.
Policia e Uellsit e arrestoi atë fillimisht në Ystalyfera, South Wales, ku drejtonte një fermë kanabisi, por rikthimi ilegal në Nottingham e çoi Shahinin përpara drejtësisë sërish. Gjatë bastisjes së pronës në Manesty Crescent, zonën Clifton, 22-vjeçari tentoi të arratisej duke kapërcyer gardhet e fqinjëve, por u neutralizua pas një ndjekjeje të shkurtër.
Brenda banesës dykatëshe, policia zbuloi 263 bimë kanabisi të kultivuara në tre kate, me një vlerë në treg që mund të arrinte deri në 200 mijë paund. Shahini pranoi fajësinë për prodhim droge të klasit B dhe hyrje të paligjshme në Britani, duke u dënua me 22 muaj burg dhe duke u rekomanduar për dëbim pas përfundimit të dënimit.
Policia e Nottinghamshire theksoi se operacione të tilla jo vetëm shkatërrojnë përfitime kriminale të mëdha, por gjithashtu zvogëlojnë rreziqet serioze për komunitetin, pasi fermat e drogës shpesh shndërrohen në vatra zjarri dhe magnet për grabitje.
