Kryeministri i Kosovës, Albin Kurti, ka kërkuar themelimin e një gjykate ndërkombëtare për hetimin dhe gjykimin e krimeve të njohura si fenomeni i “turizmit të snajperëve” gjatë rrethimit të Sarajevës në fillim të viteve ’90.

Në konferencën e dytë shkencore ndërkombëtare të Institutit të Krimeve të Kryera gjatë Luftës në Kosovë, me rastin e 18-vjetorit të Pavarësisë, Kurti deklaroi se sipas informacioneve që qarkullojnë, persona të ndryshëm paguanin shuma parash për të qëlluar civilë boshnjakë nga kodrat përreth qytetit.

“Shtëpi të verdhë nuk ka, por ka gjithnjë e më shumë informacione dhe fakte se ka pasur ‘Sarajevo safari’, ku rol thuhet të ketë pasur presidenti i Serbisë, Aleksandër Vuçiç. Për një shumë të hollash nga kodrat përreth Sarajevës mund të qëlloje boshnjakë civilë me snajper në qytetin e rrethuar. Për të hetuar dhe gjykuar krimet e ‘Sarajevo safari’ do të duhej të angazhohej ndonjë gjykatë speciale ndërkombëtare”, tha Kurti.

Deklarata e kryeministrit nxjerr në pah nevojën për drejtësi ndërkombëtare dhe përballjen me krimet e kryera gjatë luftës, duke kërkuar një mekanizëm që të sigurojë hetim të plotë dhe llogaridhënie për autorët e këtyre aktëve.