Vrasja e Renato Hoxhajt, roje parkingu në lagjen “Hajro Çakëri”, rezulton të jetë kryer nga një grup kriminal, me qëllim jo vetëm eliminimin e tij, por edhe dërgimin e një mesazhi të qartë në kuadër të përplasjes mes dy klaneve në qytet.

Sipas hetimeve të Prokurorisë së Vlorës, krimi është realizuar kundrejt pagesës dhe për ekzekutimin janë kontraktuar vrasës të huaj, me kombësi rumune. Hetimet tashmë janë mbyllur dhe tre persona janë marrë të pandehur si organizatorë të ngjarjes.

Bëhet fjalë për shtetasin rumun Daniel Cornea, i shpallur në kërkim, si dhe dy shqiptarët Kleanth Bylyku dhe Eris Mehmetaj, të cilët ndodhen në burg.

Sipas burimeve pranë hetimit, Bylyku dhe Mehmetaj akuzohen për veprën penale “Sigurimi i kushteve për të kryer vrasjen”, ndërsa Cornea akuzohet për “Vrasje me paramendim” dhe “Mbajtje pa leje të armëve të zjarrit”. Dyshohet se ai është larguar drejt Greqisë menjëherë pas krimit.

Fillimisht, ngjarja u hetua si një konflikt i mundshëm banal, por me avancimin e hetimeve doli në pah përfshirja e një strukture kriminale. Një kamera amatore ka fiksuar autorin, i cili shfaqej i maskuar dhe me trup të stërmadh. Më pas, kamerat e sigurisë në qytet identifikuan një automjet të dyshimtë, gjurmimi i të cilit çoi tek personi që e kishte në pronësi. Ky i fundit deklaroi se mjetin ia kishte dhënë një të njohuri dhe nuk kishte dijeni për përdorimin e tij në krim.

Nga hetimet rezultoi se Hoxhaj punonte si roje nate në një parkim, por edhe si roje pranë banesës së një personi me precedentë kriminalë në Vlorë, me inicialet G.S. Sipas policisë dhe prokurorisë, atentati lidhet me konfliktet e këtij të fundit.

Çështja ndaj tre të pandehurve pritet t’i nënshtrohet shqyrtimit gjyqësor në Gjykatën e Vlorës.