TIRANË – Ministrja e Brendshme, Taulant Koçiu, hodhi poshtë spekulimet se Garda e Republikës nuk kishte zbatuar vendimin e Këshillit të Lartë të Prokurorisë (KLP) për shtimin e truprojave për prokurorin e SPAK, Altin Dumani.

Në një deklaratë zyrtare, Koçiu theksoi se vendimi është zbatuar në mënyrë të plotë, duke shtuar dy truproja të tjerë në organikën e Gardës për mbrojtjen e Dumani. “KLP ka marrë vendim dhe në momentin që merr vendim ka edhe një anëtar përfaqësues nga Ministria e Punëve të Brendshme në nivelin e zv/ministrit. Jemi vënë në dijeni, kemi qenë pjesë e vendimmarrjes. Nga ana tjetër, Garda e Republikës ka zbatuar këtë vendim duke shtuar dy truproja për Dumanin në nivelin e prokurorit të SPAK. Garda ka marrë të gjitha masat dhe ka miratuar shtimin e dy punonjësve,” tha ministrja.

Kërkesa për shtimin e truprojave u bë nga kreu aktual i SPAK, Klodian Braho, për të garantuar sigurinë e Dumaniut, i cili gjatë kohës si drejtues i SPAK-it ka qenë i përfshirë në hetime të ndjeshme. Për shkak të përgjegjësive të tij, Dumani ka qenë nën mbrojtje të rreptë deri në përfundim të mandatit.