Në ditët e fundit të vitit 2025, aktorja e njohur Ema Andrea humbi vëllanë e saj binjak, ish-basketbollistin Enea Andrea, pas një arresti kardiak.

Në daljen e saj të parë publike pas kësaj ngjarjeje të rëndë, ajo nuk arriti t’i mbante lotët, ndërsa rrëfente për dhimbjen që po përjeton.

“Mua nuk më është mbyllur mirë 2025. Normal që nuk është e mirë as 2026. Kam humbur gjysmën time. Janë ato dhurata e hidhura që bën Zoti. Për momentin jetoj në dy dimensione, uroj që kjo mos të ndikojë në punë”, u shpreh ajo.

Aktorja tregoi se kjo ishte dita e saj e parë e punës dhe dalja e parë mediatike pas humbjes, duke theksuar se kishte hezituar përpara se të pranonte të fliste publikisht. “Edhe pse e kam thënë me dy mendje ‘Po’, kur erdha dhe u takuam, u dakordësova me veten që të jem këtu dhe vetëm këtu mund ta filloja”, tha Andrea.

Ajo e cilësoi temën si shumë delikate, por theksoi se nuk mund të anashkalohej dhimbja që po përjeton. “Edhe pse kjo humbje e gjysmës time më të mirë, mua më ka sjellë shumë bekime. Kam parë shumë dashuri nga njerëz që nuk i njoh, nga njerëz që i njoh”, u shpreh ajo.

Sipas saj, vëllai u përcoll “si mbret”, ndërsa falënderoi të gjithë ata që i kanë qëndruar pranë familjes në këtë periudhë të vështirë. “Dhimbja s’ka as etikë, as moral, as fjalor. Kam zbuluar që as fjalët s’janë të duhurat”, përfundoi aktorja mes emocionesh.