SKRAPAR – Operacioni për gjetjen e trupit të Ilir Kurtit, 42-vjeçarit që vendosi të vetëflijohej në Kanionet e Osumit, po rrezikon të kthehet në një tjetër tragjedi. Kërkimet e ekipit të RENEAS kanë dështuar, ndërsa në kanion ka mbetur i bllokuar një qytetar tjetër, Xhuliano Kaloti, pjesë e një grupi amatorësh të rafting-ut.

Sipas raportimeve, grupi i sportistëve u bashkua me kërkimet duke shkelur protokollet e sigurisë, ndërkohë që gomonia e drejtuar nga Murat Mamurrani, një drejtues lokal i grupit të rafting-ut, u përmbys për shkak të rrjedhës së fortë të ujit pas reshjeve.

Xhuliano Kaloti ka ngecur në një guvë të brendshme të njohur si “Porta e Djallit”, prej orës 15:00, ndërsa niveli i ujit arrin 5-6 metra, duke e kthyer situatën në një rrezik fatal. Ai ndodhet ende gjallë dhe herë pas here thërret për ndihmë, por ekipet e specializuara nuk kanë mundur ta nxjerrin nga kanioni.

Familjarë dhe banorë të zonës presin me ankth një vendim të guximshëm nga autoritetet, ndërsa nata rrit rrezikun dhe tensionin në vendngjarje. Operacioni po përballet me sfida serioze teknike dhe një situatë emergjente që kërkon koordinim maksimal dhe ndërhyrje të shpejtë për të shpëtuar jetën e Kalotit.

Rreziku është i madh, ndërsa çdo minutë që kalon shton ankthin dhe pasojat e mundshme në një nga zonat më të thella dhe të rrëmbyeshme të Kanioneve të Osumit.