Një incident i rëndë është raportuar në Napoli, ku një 40-vjeçar, tifoz i Napolit, ka përfunduar në spital pas një konflikti me bashkëshorten e tij, ndërsa po ndiqte nga televizioni ndeshjen kundër Atalantës.

Sipas mediave italiane, tensioni nisi pas një momenti të diskutueshëm në fushë, kur sistemi VAR anuloi një penallti për skuadrën napolitane. I irrituar nga vendimi, 40-vjeçari reagoi me sharje drejt ekranit. Bashkëshortja e tij 35-vjeçare dyshohet se i interpretoi fyerjet si të drejtuara ndaj saj, çka çoi në përshkallëzim të menjëhershëm të debatit verbal.

“Largohu ose do të të godas me thikë”, mësohet të ketë thënë gruaja gjatë konfliktit. Fillimisht ajo hodhi një palë gërshërë në drejtim të tij, por pa e goditur. Më pas, sipas raportimeve, ajo mori një thikë nga kuzhina dhe arriti ta plagosë në zonën e ijeve.

Ndërsa 40-vjeçari kërkonte ndihmë, situata u neutralizua nga ndërhyrja e karabinierëve të stacionit Capodimonte, të cilët parandaluan përshkallëzim të mëtejshëm. Në vendngjarje u gjetën edhe tre thika të tjera.

I plagosuri është transportuar në Ospedale del Mare, ku po merr trajtim mjekësor. Burime spitalore bëjnë me dije se ai ka pësuar lëndime të shumta, por ndodhet jashtë rrezikut për jetën.

Autoritetet po hetojnë rrethanat e plota të ngjarjes.