Banorët e lagjes rurale Sualti në qytezën Baskale të provincës Van në Turqi po përballen me një nga dimrat më të ashpër të viteve të fundit. Të vendosur pranë kufirit me Iranin, rreth 98 kilometra nga qendra e qytezës dhe të rrethuar nga male të larta, ata mund të arrijnë në qendër vetëm duke kaluar nëpër një “korridor dëbore”, ku grumbujt kanë arritur disa metra lartësi për shkak të ortekëve.

Lagjja me rreth 80 shtëpi përjeton vazhdimisht stuhi bore dhe reshje të dendura. Banorët kalojnë një pjesë të madhe të ditës duke pastruar dëborën dhe duke u kujdesur për kafshët e tyre, ndërsa dimri i gjatë e bën jetën edhe më të vështirë.

Rruga që lidh zonën me qendrën e qytezës kalon përgjatë shpateve malore dhe ka 18 pika të rrezikuara nga ortekët, çka bën që ajo të jetë shpesh e mbyllur. Në raste të caktuara, banorët mbeten të izoluar për ditë të tëra. Edhe kur rruga hapet, ata detyrohen të kalojnë mes grumbujve të dëborës që në disa zona arrijnë 8-9 metra lartësi, për të përmbushur nevojat bazë.

Situata nxjerr në pah vështirësitë e jetesës në zonat malore të largëta, ku kushtet e motit ndikojnë drejtpërdrejt në përditshmërinë e komunitetit.