Pas vendimit për ashpërsimin e masave ndaj drejtuesve që parkojnë në mënyrë të dyfishtë ose në hapësira që pengojnë qarkullimin dhe sigurinë publike, strukturat e Policisë së Vlorës kanë nisur një aksion të gjerë kontrolli në të gjithë qytetin.

Në terren kanë zbritur njëkohësisht Drejtoria Vendore e Policisë, Forcat “Shqiponja”, Policia e Qarkullimit Rrugor dhe shërbimet e rendit, duke zhvilluar kontrolle të përqendruara në zonat më problematike. Fokus i veçantë u vu tek akset kryesore, rrugët me fluks të lartë, pranë institucioneve publike, shkollave, spitaleve dhe zonave tregtare, ku parkimi i paligjshëm ka krijuar bllokime dhe rrezik për këmbësorët.

Sipas të dhënave paraprake, gjatë ditëve të para të aksionit janë vendosur qindra masa administrative ndaj drejtuesve që kanë shkelur rregullat, ndërsa një numër i konsiderueshëm mjetesh është bllokuar dhe larguar me karrotrec. Ky instrument është rikthyer për të disiplinuar parkimin e automjeteve që bllokojnë korsitë, hyrje-daljet e banesave apo bizneseve, trotuaret dhe hapësirat për personat me aftësi të kufizuar.

Autoritetet theksojnë se toleranca ndaj shkeljeve do të jetë zero dhe aksioni do të vijojë çdo ditë me patrullime dhe kontrolle të befasishme. Për drejtuesit që përsërisin shkeljet, parashikohen masa më të ashpra, përfshirë gjoba më të larta dhe procedura shtesë sipas ligjit.