Një raund tjetër bisedimesh që synojnë përfundimin e luftës në Ukrainë mund të zhvillohet në fund të kësaj jave, bëri të ditur shefi i stafit të Presidentit Volodymyr Zelenskiy, Kyrylo Budanov, në një deklaratë për mediat ukrainase.

Ukraina, Rusia dhe Shtetet e Bashkuara kanë zhvilluar disa raunde negociatash në Abu Dhabi dhe Gjenevë, ndërsa Uashingtoni po shtyn për t’i dhënë fund luftës që nisi me pushtimin rus në vitin 2022.

“Mendoj se në fund të javës, këtë javë”, u shpreh Budanov kur u pyet për takimin e ardhshëm. Ai theksoi se negociatat nuk janë të lehta, por se palët po afrohen drejt momentit të vendimeve përfundimtare. “Nuk është sekret që negociatat nuk janë të lehta, por ne padyshim po ecim përpara dhe po i afrohemi momentit kur të gjitha palët do të duhet të marrin vendime përfundimtare — nëse do ta vazhdojnë këtë luftë apo do të kalojnë në paqe”, citohet ai nga zyra e presidentit.

Budanov njoftoi gjithashtu se një shkëmbim i ri i të burgosurve të luftës midis Rusisë dhe Ukrainës mund të ndodhë gjatë kësaj jave dhe se ai mund të jetë më i madh se ai i mëparshmi, kur secila palë ktheu nga 157 të burgosur.

I pyetur për sjelljen e Rusisë në negociata, ai tha se delegacioni rus është treguar “i përmbajtur, i sjellshëm dhe profesional”, duke shtuar se pavarësisht korrektësisë diplomatike, qëndrimet e palëve mbeten të ndryshme.

Sa i përket mundësisë së një takimi mes presidentëve të Ukrainës dhe Rusisë, Budanov tha se po bëhen përpjekje për ta organizuar, por aktualisht një gjë e tillë mbetet “shumë e vështirë”.