Gjykata ka vendosur masën e sigurisë “arrest me burg” për Roland Puja Deraj, i dyshuar si autor i vrasjes së Skerdilajd Isufit në Kavajë.

Ngjarja e rëndë ndodhi të shtunën, ku 48-vjeçari Isufi humbi jetën si pasojë e plagëve të marra me mjet prerës.

Sipas informacioneve paraprake nga hetimet, viktima kishte shkuar për vizitë te xhaxhai i tij dhe kishte parkuar automjetin pranë banesës së 48-vjeçarit Deraj. Ky i fundit ka dalë nga shtëpia dhe i ka kërkuar që të largonte makinën nga aty.

Debati për parkimin ka degjeneruar në konflikt verbal mes dy personave. Gjatë përplasjes, dyshohet se viktima i është përgjigjur në mënyrë të ashpër autorit të dyshuar. Sipas hetimeve paraprake, në vijim të debatit, Roland Puja Deraj ka nxjerrë një mjet prerës dhe e ka goditur viktimën në zonën e kraharorit.

Pavarësisht ndërhyrjes dhe transportimit drejt spitalit, 48-vjeçari nuk ka mundur t’u mbijetojë plagëve të marra. Hetimet për zbardhjen e plotë të rrethanave të ngjarjes vijojnë.