Aktorja amerikane Christina Applegate ka ndarë një përditësim të hapur mbi gjendjen e saj shëndetësore, duke treguar se për shkak të sklerozës multiple tashmë kalon pjesën më të madhe të ditës e shtrirë në shtrat. 54-vjeçarja, e cila e bëri publike diagnozën në vitin 2021, foli për revistën People, ku pranoi se dhimbjet e forta dhe lodhja e vazhdueshme e kufizojnë ndjeshëm në përditshmëri.

Sipas saj, ka ditë kur e ka të pamundur të qëndrojë gjatë në këmbë, ndaj pushimi është bërë pjesë thelbësore e rutinës së saj.

Megjithatë, pavarësisht sfidave, Applegate përpiqet të ruajë momente të veçanta me vajzën e saj 15-vjeçare, Sadie. Ajo tregon se sa herë që mundet e çon vetë në shkollë, duke e cilësuar këtë si pjesën më të bukur të ditës. “Është koha jonë vetëm për vetëm”, është shprehur aktorja, duke theksuar se përqendrohet te një qëllim i thjeshtë: ta çojë të bijën e sigurt dhe më pas të kthehet në shtëpi për të pushuar.

Ndërkohë, ajo po përgatitet për publikimin e librit autobiografik You With the Sad Eyes, që pritet të dalë më 3 mars. Në këtë rrëfim personal, aktorja do të trajtojë jo vetëm përballjen me sklerozën multiple, por edhe fëmijërinë si yll i vogël, sfidat në industrinë e argëtimit dhe përvojat e vështira që kanë lënë gjurmë në jetën e saj.