Drejtoria e Përgjithshme e Shërbimeve të Transportit Rrugor, në bashkëpunim me Policia Rrugore dhe Task-Forcën e Transportit Rrugor, ka nisur prej të martës një fushatë të re kontrolli inteligjent në akset kryesore të vendit.

Aksioni ka filluar në segmentin Tiranë–Milot, një nga rrugët me fluks të lartë qarkullimi, dhe pritet të shtrihet gradualisht në disa prej akseve kryesore kombëtare.

Autoritetet kanë vënë në funksion mjete të pajisura me kamera dhe sisteme të automatizuara që mundësojnë identifikimin në kohë reale të automjeteve në lëvizje. Përmes kësaj teknologjie kryhet verifikimi i dokumentacionit të mjeteve, kontrolli i vlefshmërisë së kontrollit teknik, siguracionit dhe detyrimeve të tjera ligjore.

Sistemi lejon evidentimin e shkeljeve pa ndalur fizikisht çdo mjet, duke synuar rritjen e efikasitetit në terren dhe forcimin e transparencës gjatë kontrolleve.

Sipas DPSHTRR-së, fushata ka si qëllim rritjen e sigurisë rrugore, identifikimin e mjeteve me mangësi ligjore apo dokumentacion të parregullt, si dhe ndërgjegjësimin e drejtuesve për respektimin e rregullave të qarkullimit, përfshirë kufijtë e shpejtësisë.