Një ditë pas nisjes së procedimit penal ndaj një mjeku në Durrës, i dyshuar për neglizhencë mjekësore që mund të ketë çuar në humbjen e jetës së një foshnje, Spitali Rajonal i Durrësit ka ngritur një komision të posaçëm për shqyrtimin e rastit.

Drejtoria e Spitalit Rajonal njofton se “është ngritur komision për të bërë oponencën e kartelës mjekësore nga ana klinike, sipas protokolleve mjekësore”, pa dhënë detaje të tjera mbi rrethanat konkrete të ngjarjes.

Ndërkohë, Policia e Durrësit bëri me dije se materialet janë referuar në Prokurori, ku ka nisur procedimi penal për shtetasin me iniciale I. Sh., 43 vjeç, me detyrë mjek në Spitalin Rajonal Durrës. Kallëzimi është bërë nga shtetasja A. B., e cila pretendon se më 19 shkurt 2026 ka sjellë në jetë foshnjën e saj në maternitetin e këtij spitali dhe se, për shkak të neglizhencës së mjekut, foshnja ka humbur jetën pas disa orësh.

Hetimet janë në vijim për zbardhjen e plotë të rrethanave dhe për të përcaktuar nëse ka pasur shkelje të protokolleve mjekësore.