Tiranë – Ministrja e Punëve të Brendshme, Albana Koçiu, deklaroi sot se mbrojtja e interesit publik dhe lufta pa kompromis kundër çdo forme të paligjshmërisë mbeten themeli i veprimtarisë së ministrisë.

Gjatë mbledhjes së zgjeruar të grupit parlamentar të Partisë Socialiste dhe kabinetit qeveritar, Koçiu theksoi se autoriteti i ligjit mbi territorin duhet të jetë i padiskutueshëm. “E kemi nisur me operacionin e ligjshmërisë në territor, i cili tashmë ka karakter të përhershëm. Abuzimi me territorin nuk do të shpërblehet më,” u shpreh ministrja.

Sipas Koçiut, deri tani janë evidentuar 252 subjekte që kanë shkelur lejen e ndërtimit, janë prishur 447 ndërtime ose shtesa pa leje dhe janë vendosur gjoba administrative në vlerën prej rreth 12 milionë euro. Ministria po monitoron gjithashtu cilësinë e ndërtimit, respektimin e hapësirave të përbashkëta dhe mbrojtjen e investimeve të qytetarëve.

Ministrja prezantoi një paketë ndryshimesh ligjore për përmirësimin e punës së administratës në komunitet dhe qasjes ndaj territorit. Ndryshimet kryesore përfshijnë harmonizimin e Inspektoratit Kombëtar të Mbrojtjes së Territorit me inspektoratet vendore, forcimin e rolit të prefektit si koordinues në nivel vendor dhe shtimin e dy prefektëve detarë për të rritur sigurinë dhe ligjshmërinë.

Koçiu nënvizoi gjithashtu rëndësinë e pjesëmarrjes së qytetarëve dhe rolin e Policisë Bashkiake si krah mbështetës për Policinë e Shtetit, me synimin për ta kthyer atë në një strukturë profesionale me standarde të unifikuara në të gjithë vendin.