Ministri i Jashtëm i Iranit, Abbas Araghchi, i bëri sot thirrje Këshillit të Sigurimit të Kombeve të Bashkuara që të veprojë menjëherë, pas sulmeve të ndërmarra nga Izraeli dhe Shtetet e Bashkuara kundër vendit të tij.

Në një letër drejtuar OKB-së, Araghchi deklaroi se SHBA-ja dhe Izraeli duhet të “mbajnë plotësisht dhe tërësisht përgjegjësi për pasojat e veprimeve të tyre të paligjshme”. Ai shtoi se Irani vepron në vetëmbrojtje legjitime dhe kërkoi që komuniteti ndërkombëtar të dënojë këtë akt agresioni.

Sipas njoftimit të OKB-së, Këshilli i Sigurimit, ku SHBA-ja ka të drejtën e vetos, do të mblidhet sot në orën 21:00 GMT për të diskutuar situatën në Lindjen e Mesme pas operacionit ushtarak. Takimi zhvillohet në një klimë tensionesh të larta diplomatike, ndërsa komuniteti ndërkombëtar bën thirrje për përmbajtje dhe rikthim në dialog për të shmangur përshkallëzimin e mëtejshëm të konfliktit në rajon.