Grupet kriminale shqiptare po përdorin platforma si TikTok, Facebook dhe Instagram për të shitur cigare me çmime të ulëta dhe me “dërgesë ekspres” në shtëpitë britanike, sipas një hetimi të publikuar nga Daily Mail. Aktiviteti i tyre ka një ndikim të madh ekonomik, duke i kushtuar Thesarit britanik mbi 3 miliardë paund në vit nga humbja e taksave.

Policia britanike dhe autoritetet doganore thonë se tregtia dominohet nga organizata ndërkombëtare kriminale, ku fitimet e kontrabandës së duhanit përdoren për aktivitete të tjera kriminale, përfshirë trafikun e drogës, armëve dhe njerëzve. Grupet shqiptare tashmë kontrollojnë pjesën më të madhe të tregut të kokainës në Mbretërinë e Bashkuar dhe po zgjerojnë aktivitetin edhe në tregun e zi të cigareve.

Hetimet zbuluan llogari në TikTok dhe Facebook në gjuhën shqipe që ofronin marka të mëdha cigare, si Marlboro, për çmime 6–7 paund për pako, krahasuar me mesataren prej 16 paund në Mbretërinë e Bashkuar. Një test i kryer nga gazetari i Daily Mail tregoi se dhjetë pako Marlboro Gold mund të blihen për vetëm 65 paund, ndërkohë që çmimi zyrtar në supermarket është 177.5 paund për të njëjtën sasi.

Profesori Ervin Karamuco, ekspert i kriminologjisë në Universitetin Shtetëror të Tiranës, tha se këto aktivitete janë të zakonshme për organizatat kriminale shqiptare dhe përbëjnë një burim të rëndësishëm të të ardhurave:

“Edhe pse ky aktivitet nuk është aq fitimprurës sa droga, ai mbetet një burim i rëndësishëm i të ardhurave kriminale. Zyrtarët e korruptuar të doganave shpesh i mbyllin sytë ndaj këtyre dërgesave ose i organizojnë ato në mënyrë aktive.”

Grupet kriminale shqiptare janë të përfshira në kontrabandën e cigareve në Evropë për më shumë se 20 vjet. Në 2015, një bandë shqiptare u kap me mbi një milion cigare të paligjshme në një kamion frigoriferik, ndërsa fabrika Albania Tabak – Fabrika e Re e Cigareve në Librazhd dyshohet se prodhonte miliona cigare falsifikuar, duke i dërguar me rrugë tokësore dhe detare në vende të BE-së dhe Mbretërinë e Bashkuar.

Autoritetet britanike luajtën një rol kyç në mbylljen e fabrikës, duke ndarë informacione me Strukturën Speciale të Shqipërisë kundër Korrupsionit dhe Krimit të Organizuar (SPAK). Hetimet vijojnë për të identifikuar rrjetet e shpërndarjes dhe lidhjet ndërkombëtare të kontrabandës.