Goditet një tjetër rast i kontrabandës në Pikën Kufitare të Kapshticës, ku policia ka vënë në pranga një 54-vjeçar të dyshuar për kontrabandë mallrash.

Burime zyrtare bëjnë me dije se shtetasi A.I., 54 vjeç, banues në Korçë, u arrestua pasi dyshohet se transportonte pa dokumentacion përkatës medikamente të ndryshme mjekësore dhe një sasi veshjesh të kontrabanduara nga Greqia.

Sipas policisë, gjatë kontrolleve të intensifikuara për parandalimin e paligjshmërive në kufi, shërbimet e Drejtorisë Vendore për Kufirin dhe Migracionin Korçë ndaluan për kontroll në vijën e dytë automjetin që drejtohej nga 54-vjeçari, në hyrje të Republikës së Shqipërisë, në PKK Kapshticë.

Nga kontrolli i ushtruar në automjet u gjetën medikamente të ndryshme mjekësore dhe veshje pa dokumentacionin përkatës. Mallrat e dyshuara të kontrabanduara, së bashku me automjetin, u sekuestruan në cilësinë e provës materiale.

Në vijim të veprimeve procedurale, 54-vjeçari u arrestua në flagrancë për veprën penale “Kontrabanda me mallra të licencuara”.

Materialet procedurale iu referuan Prokurorisë së Korçës për veprime të mëtejshme.