Në gjyqin ndaj anëtarëve të grupit kriminal të Laert Haxhiut kanë dëshmuar disa shtetas të thirrur nga prokuroria për ngjarje të ndryshme kriminale, mes tyre edhe për vrasjen e biznesmenit Çajup Selimi, të ndodhur më 1 qershor 2021 në Tepelenë.

Mes dëshmitarëve në seancë ishin edhe babai dhe vëllai i Erisiano dhe Bujar Abedinit, të dyshuar si pjesëmarrës në këtë vrasje.

Njëri prej dëshmitarëve deklaroi para gjykatës se kishte pasur probleme të mëparshme me viktimën, pasi sipas tij Çajup Selimi i telefononte vazhdimisht bashkëshortes së tij.

“Jam në dijeni të ngjarjes së Çajup Selimit. Në atë periudhë kisha nënën në spital, kishte 20 ditë e shtruar dhe më datën 12 ndërroi jetë. Unë dhe vëllai Bujar e vizitonim. Në atë kohë punoja me materiale ndërtimi në Tepelenë, ndërsa nusja punonte në dyqan. Çajup Selimi shiste çimento afër dyqanit tonë,” dëshmoi ai.

Dëshmitari shtoi se konflikti mes tyre kishte nisur rreth dy vite para ngjarjes.

“Me Çajupin kemi pasur probleme se i bënte telefon nuses sime në çdo orë të ditës e të natës. E pata marrë vesh rreth dy vite para vrasjes. Ai e pranonte se e telefononte gruan. Cajupi i dërgonte mesazhe dhe e përndiqte. Gruaja i thoshte: ‘Mos më bëj më telefon dhe mos më shkruaj më’,” u shpreh ai para gjykatës.

Ai tregoi gjithashtu se banesa e tij ndodhej mbi ambientin e biznesit që kishte në Tepelenë.

“Banesa ime ndodhet në kat të dytë, ndërsa katin e parë e kisha biznes. Vëllai im Bujar nuk ka qenë në dijeni të këtyre problemeve. Në Ksamil kemi një hotel, ku kam investuar bashkë me familjen, më ka ndihmuar edhe motra dhe kam marrë kredi,” tha dëshmitari.

Në lidhje me natën e vrasjes, ai deklaroi se kishte marrë vesh për ngjarjen rreth mesnatës.

“Në orën 12 të asaj nate mora vesh se kanë vrarë Çajupin. Kur shkova në polici e mora vesh. Djali im ishte në Tiranë, pasi nusja e tij kishte probleme, dhe erdhi në Tepelenë pas disa ditësh. Nuk i shkova në varrim Çajupit, sepse isha në polici,” përfundoi ai.