Gjykata e Tiranë ka vendosur masën e sigurisë “arrest me burg” për Gazmend Bucpapaj, i dyshuar si autor i vrasjes së Egli Pashollari, ngjarje e ndodhur në fund të muajit shkurt në kryeqytet.

Vendimi u mor pasi togat e zeza dëgjuan pretendimet e palëve gjatë seancës gjyqësore, duke vendosur që Bucpapaj të vijojë të qëndrojë në qeli ndërsa hetimet për ngjarjen vazhdojnë.

Avokati mbrojtës i tij, Kol Hyseni, deklaroi se klienti i tij ka vepruar në kushtet e vetëmbrojtjes. Sipas tij, Bucpapaj është ndjerë i ofenduar nga viktima në momentin kur kishte shkuar për të marrë bashkëshorten e tij.

“Klienti im ka vepruar në kushtet e mbrojtjes dhe nuk është arrestuar nga policia, por është vetëdorëzuar”, u shpreh avokati Hyseni pas përfundimit të seancës.

Megjithatë, gjykata vendosi që Gazmend Bucpapaj të mbetet në burg deri në një vendim tjetër, ndërsa organet e hetimit po vijojnë punën për zbardhjen e plotë të rrethanave të kësaj ngjarjeje të rëndë.