Debatet në Kuvend janë përshkallëzuar sot me replikat mes deputetit Belind Këlliçi, kryetarit të Kuvendit Niko Peleshi dhe ish-ministres së Jashtme, Elisa Spiropali.

Belind Këlliçi kritikoi menaxhimin e seancës dhe reagimet e mazhorancës, duke thënë se largimi i Spiropalit si pjesë e “klubit të anglishtfolësve” në PS e kishte detyruar të radikalizohej për arsye të brendshme. Ai shtoi:
“Ma ler fjalën se kam 3 muaj që nuk jam në Parlament. E tentove të na hiqje fjalën… Kërkova të zbatohej kërkesa për masën ndaj Ballukut. Këtë kërkon Brukseli dhe ndërkombëtarët. Është absurde që t’i ndalosh replikën opozitës.”

Këlliçi gjithashtu kritikoi përjashtimin 20-ditor të deputetit Agron Shehaj dhe mënyrën e drejtimit të seancës, duke kërkuar qetësi dhe respekt të rregullave: “Lërini konfliktet. Qëndroni në lartësinë e detyrës suaj.”

Nga ana e saj, Elisa Spiropali u përgjigj duke mbrojtur profesionalizmin e saj dhe qetësinë në Kuvend:
“Nuk flas vetëm anglisht, flas dhe gjuhë të tjera. Çdo detyrë në Kuvendin e Shqipërisë është nder. E vetmja gjë që më vjen keq, se largimin e paralajmëroi Berisha dhe jo ndonjë tjetër. Vetëm për këtë jam e habitur.”

Replikat mes opozitës dhe mazhorancës treguan tensionet e vazhdueshme rreth kontrollit të foltores dhe kohës së të folurit për deputetët, duke theksuar presionet e jashtme mbi procesin parlamentar.