Seanca plenare e kësaj të enjteje nisi me një minutë heshtje në nderim të heroit kombëtar Adem Jashari dhe familjes së tij, në kujtim të sulmeve të Serbisë më 5 mars 1998 në Prekaz. Kërkesa për këtë minutë heshtje erdhi nga Partia Socialiste dhe u drejtua nga kreu i grupit parlamentar, Taulant Balla.

Partia Demokratike kërkoi gjithashtu një minutë heshtje për ish-deputetin Tomor Dosti, i cili ndërroi jetë një ditë më parë.

Pas debatit për procedurën dhe mosfutjen në rendin e ditës së raporteve mbi kërkesën e Prokurorisë së Posaçme për heqjen e mandatit të deputetes Belinda Balluku, seanca vijoi me votimin e ndryshimeve në kabinetin qeveritar. Katër ministrat e rinj ishin ulur në lozhat e Kuvendit, duke pritur votëbesimin për t’u betuar më pas para Presidentit të Republikës.

Ndryshimet në qeverinë “Rama 4”:
• Albana Koçiu – zv.kryeministre, zëvendëson Belinda Ballukun
• Enea Karakaçi – ministër i Infrastrukturës dhe Energjitikës, zëvendëson Belinda Ballukun
• Besfort Lamallari – ministër i Brendshëm, zëvendëson Albana Koçiun
• Toni Gogu – ministër i Drejtësisë, zëvendëson Besfort Lamallarin
• Ferit Hoxha – ministër i Jashtëm, zëvendëson Elisa Spiropalin
• Ermal Nufi – ministër i Mbrojtjes, zëvendëson Pirro Vengu
• Eriona Ismaili – ministër për Marrëdhëniet me Parlamentin, zëvendëson Toni Gogun

Seanca pasqyroi tensionet për procedurën parlamentare, por edhe vendimet strategjike të qeverisë për kabinetin e ri.