Një operacion i koordinuar i Shteteve të Bashkuara dhe Izraelit ka goditur Iranin mes datave 27-28 shkurt 2026, duke shënuar një nga fazat më të tensionuara të marrëdhënieve në Lindjen e Mesme në dekadat e fundit. Sipas njoftimeve zyrtare, qëllimi i operacionit ishte shkatërrimi i programeve bërthamore dhe raketore të Iranit, dobësimi i proxy-ve të tij dhe thirrje për ndryshim të regjimit nga brenda vendit.

Në ditët e para të sulmeve u konfirmua vrasja e Ayatollah Ali Khamenei dhe disa figurave të larta të IRGC-së, duke krijuar boshllëk në zinxhirin e komandës. Mbi 2000 goditje ajrore dhe raketore shkatërruan baza ajrore, depove municionesh, launcher-a ballistikë dhe 24 anije të marinës iraniane. Ekspertët amerikanë flasin për një degradim të rëndësishëm të kapaciteteve ushtarake iraniane dhe dominim të SHBA-Izraelit në hapësirën ajrore lokale.

Megjithatë, forcat iraniane reaguan me raketa ballistike dhe dronë, duke goditur bazat amerikane dhe rajone të tjera, përfshirë Turqinë dhe Azerbajxhanin, ku u plagosën civilë. Këto zhvillime tregojnë përpjekje të Iranit për të shpërndarë konfliktin dhe për të rritur presionin ndaj aleatëve të SHBA-së në rajon.

Ekspertët paralajmërojnë se megjithë goditjet masive, regjimi mbetet funksional përmes IRGC-së, forca që kontrollon ekonominë, sigurinë dhe programet bërthamore. “Vrasja e Khameneit nuk është e njëjtë me rrëzimin e sistemit”, thekson Linda Robinson, eksperte e sigurisë ndërkombëtare.

Ndërkohë, diplomacia ka dështuar plotësisht. Pas dy raundeve negociatash, Irani konsideroi se propozimet e jashtme ishin një “maskë para sulmeve ajrore”, duke rritur skepticizmin për dialog të ardhshëm.

Bilanci i gjashtë ditëve të para: arritje taktike për SHBA-Izraelin, dobësim i aftësive ushtarake iraniane dhe superioritet ajror, por rreziku i zgjerimit rajonal dhe konflikteve të reja mbetet i lartë. Ekspertët paralajmërojnë se kjo mund të jetë vetëm fillimi i një lufte të gjatë me pasoja të paparashikuara në Lindjen e Mesme dhe më gjerë.