Qyteti i Vlorës është kthyer sot në qendër të një operacioni masiv të forcave speciale, ku RENEA ka blinduar zonën e njohur si Uji i Ftohtë. Sipas pamjeve të siguruara, policë të shumtë janë pozicionuar në pika kyçe, ndërsa po kryhen kontrolle në disa banesa. Operacioni përfshin rreth 40 efektivë të forcave speciale dhe rreth 10 mjete, përfshirë edhe mjete të blinduara, duke u monitoruar nga ajri përmes përdorimit të dronëve. Në aksion janë angazhuar gjithashtu policia e Vlorës dhe Byroja Kombëtare e Hetimit.

Ky operacion lidhet me zbardhjen e vrasjes së Gentian Qarrit, e kryer më 6 shkurt 2021 në Vlorë. Autorët e sulmit kishin mbërritur me një automjet “Toyota Yaris” dhe e qëlluan Qarri me 20 plumba, 6 prej të cilëve në trup. Qarri, i rikthyer në Vlorë pas vuajtjes së 11 viteve burg në Itali për trafik droge, ishte bërë objekt i hetimeve të SPAK për lidhje me grupin e Inez Hajrullës.

SPAK ka lëshuar 7 urdhër-arreste, nga të cilat të paktën dy janë ekzekutuar në burg, ndërsa operacioni vijon dhe nuk ka një konfirmim të saktë për të gjitha masat e zbatuara deri tani. Hetimet kryesore kanë shfrytëzuar të dhëna nga aplikacioni i koduar Sky Ecc, duke lejuar identifikimin e pjesëtarëve të grupit dhe lidhjet e tyre me ngjarje kriminale të kaluara.