Policia e Korçës ka vënë në pranga një 59-vjeçar të dyshuar për tentativë vrasjeje. I arrestuari është Bujar Rizvani, i cili sipas uniformave blu ka tentuar të vrasë me thikë një 60-vjeçar në lagjen nr. 6 të qytetit.

Sipas njoftimit zyrtar, shërbimet e Komisariatit të Policisë Korçë kanë reaguar menjëherë pas marrjes së informacionit se gjatë një konflikti një person ishte goditur me mjet prerës. Efektivët kanë shkuar në adresën e dhënë dhe kanë bërë të mundur kapjen dhe arrestimin e autorit të dyshuar, shtetasit me inicialet B. R., 59 vjeç, banues në Korçë.

Nga veprimet hetimore dhe këqyrja e pamjeve filmike ka rezultuar se gjatë një konflikti për motive të dobëta, 59-vjeçari ka tentuar ta godasë disa herë me thikë 60-vjeçarin.

Si pasojë e sulmit, i dëmtuari ka marrë disa dëmtime trupore dhe është transportuar për mjekim në spitalin e Korçës, ku ndodhet jashtë rrezikut për jetën.

Materialet procedurale i janë referuar Prokurorisë për veprime të mëtejshme.