Prokuroria e Posaçme SPAK ka blerë një nga paisjet më të avancuara elektronike dhe inteligjente në botë, “IMSI Catcher”, me vlerë rreth 1 milion euro, dhe një skuadër e Byrosë Kombëtare të Hetimit po trajnohet prej disa muajsh për përdorimin e saj në terren.

Paisja ka funksione të avancuara si:
• përgjim dhe mbledhje të të dhënave telefonike,
• lokalizim,
• interceptim i të dhënave të komunikimit nëpër aplikacione.

Konfirmimi zyrtar për blerjen është bërë nga SPAK, por nuk janë dhënë detaje mbi kontraktuesin apo vlerën e saktë të paisjes. Ajo është blerë përmes një procedure sekrete, me motivimin e forcimit të kapaciteteve operative dhe luftën kundër Krimit të Organizuar.

Në kuadër të projektit, SPAK ka siguruar gjithashtu modernizimin e sistemit të përgjimit, duke përfshirë përditësimin e versionit, rritjen e kapaciteteve të ruajtjes së të dhënave dhe shtimin e modulit për interceptimin e të dhënave IP. Vlera totale e këtyre projekteve arrin në 5.1 milionë euro, sipas vendimit nr. 188 të Komitetit Ndërinstitucional për Masat Kundër Krimit të Organizuar, datë 9 qershor 2025.

Historikisht, paisje të tilla janë përdorur në Shqipëri fillimisht nga Shërbimi Informativ Ushtarak, pastaj nga Shërbimi Informativ Shtetëror dhe Policia e Shtetit për operacione hetimore, gjithmonë me autorizim të prokurorit ose vendim gjykate.

SPAK tashmë ka rritur kapacitetet e tij për përgjime, duke synuar pavarësi nga Policia e Shtetit dhe duke koordinuar operacionet direkt me oficerët e BKH-së. Megjithatë, mbetet për t’u parë nëse paisja do të përdoret vetëm për qëllime hetimi ose edhe jashtë kornizës ligjore të prokurorisë.

Kjo blerje e re tregon një nivel të lartë teknologjik dhe logjistik në arsenalin operativ të SPAK, duke u përgatitur për operacione të sofistikuara kundër krimit të organizuar dhe rasteve komplekse hetimore.