Organizata Botërore e Shëndetësisë ka dhënë alarmin për qytetarët e Iranit pas raportimeve për reshje shiu të përziera me mbetje nafte, fenomen i njohur si “shi i zi”, që ka pasuar sulmet ndaj instalimeve të naftës në vend. Zyra e OBSH-së në Iran, në bashkëpunim me autoritetet vendase, ka marrë gjatë kësaj jave informacione për përqendrime të larta të përbërjeve toksike në atmosferë, që mund të shkaktojnë probleme serioze shëndetësore, veçanërisht në sistemin respirator.

Të hënën, kryeqyteti Teheran u mbulua nga re të dendura tymi të zi pas bombardimeve të një rafinerie nafte, pjesë e fushatës ushtarake amerikano-izraelite ndaj infrastrukturës energjetike të Iranit. Zëdhënësi i OBSH-së, Christian Lindmeier, në një konferencë për shtyp në Gjenevë, theksoi se fenomeni paraqet rrezik real për popullsinë.

“Shiu i zi dhe shiu acid që e shoqëron përbëjnë një rrezik të vërtetë për shëndetin publik, sidomos për sistemin respirator,” deklaroi Lindmeier, duke shtuar se autoritetet iraniane kanë këshilluar qytetarët të qëndrojnë brenda në shtëpi. OBSH mbështet këtë rekomandim si një masë të arsyeshme mbrojtjeje ndaj grimcave toksike.

Ekspertët paralajmërojnë se tymi dhe kontakti me ndotësit atmosferikë, përfshirë hidrokarburet toksike, oksidet e squfurit dhe përbërjet azotike, mund të shkaktojnë dhimbje koke, irritim të lëkurës dhe syve, si dhe vështirësi në frymëmarrje. Ekspozimi afatgjatë ndaj disa prej këtyre substancave rrit gjithashtu rrezikun për zhvillimin e disa llojeve të kancerit.

Autoritetet shëndetësore dhe OBSH-ja vazhdojnë të monitorojnë situatën, ndërsa qytetarët këshillohen të shmangin kontaktin me ajrin e ndotur dhe të ndjekin masat e mbrojtjes së sigurisë personale.