Banorët e fshatit Rrjoll kanë protestuar përpara Prokurorisë së Posaçme (SPAK), duke kundërshtuar ndërtimin e një resorti turistik në zonën e Velipojës dhe duke kërkuar hetim për çështjen e pronësisë së tokave.

Protestuesit deklarojnë se disponojnë dokumente që dëshmojnë se tokat janë në pronësi të familjeve të tyre brez pas brezi që prej viteve 1930. Sipas tyre, kallëzimet e bëra më herët nuk janë hetuar siç duhet nga Prokuroria dhe Gjykata e Shkodrës.

Për herë të dytë, banorët iu drejtuan SPAK me protestë, duke kërkuar që institucioni të marrë në shqyrtim dosjen dhe të verifikojë punën e prokurorëve dhe gjyqtarëve të Shkodrës. Ata pretendojnë se pronat janë në pronësi të tyre dhe jo të një personi që, sipas tyre, ia ka kaluar tokën një investitori për ndërtimin e resortit turistik.

Banorët kanë paralajmëruar se do të dorëzojnë në SPAK edhe emrat e prokurorëve dhe gjyqtarëve që, sipas tyre, kanë abuzuar me trajtimin e dosjes. Gjatë protestës, disa prej tyre goditën me vezë godinën e institucionit.

Pak ditë më parë, banorët e Rrjollit depozituan një kërkesë zyrtare në Prokurori, ku kërkojnë një zgjidhje të shpejtë ligjore për verifikimin e dokumenteve që pretendojnë se vërtetojnë pronësinë e tyre mbi tokën ku po ndërtohet resorti turistik.