Këngëtari Besart Kelmendi, i njohur si Gjesti, është arrestuar të mërkurën në Prishtinë nën dyshimin për armëmbajtje pa leje.

Sipas Policisë, ai u ndalua rreth orës 15:00 në rrugën “Mehmet Isahi”. Pas arrestimit, Gjesti është marrë në pyetje nga policia.
Prokuroria Themelore në Prishtinë njofton se reperi Gjesti është ndaluar për 48 orë me urdhër të Prokurorit Kujdestar, për shkak të dyshimeve se ka kryer disa vepra penale. Mes të dyshuarave përfshihen:
• Mbajtja në pronësi, kontroll ose posedim të paautorizuar të armëve (neni 366 i Kodit Penal të Kosovës)
• Kanosja (neni 181 i KPRK-së)
• Asgjësim apo dëmtim i pasurisë (neni 321 i KPRK-së)

Prokurori i Shtetit, në koordinim me Policinë e Kosovës, po ndërmerr të gjitha veprimet hetimore dhe procedurale lidhur me rastin. Në këtë fazë, për shkak të integritetit të hetimeve, nuk mund të jepen detaje shtesë.

Prokuroria siguron se brenda afateve ligjore do të vendosë për masat e mëtejshme në përputhje me Kodin e Procedurës Penale të Republikës së Kosovës.