Në seancën plenare të kësaj të enjteje në Kuvendin e Shqipërisë, anëtari i Këshillit të Mandateve, Oerd Bylykbashi, ka lexuar raportin e hartuar nga Partia Demokratike lidhur me kërkesën e Prokurorisë së Posaçme (SPAK) për heqjen e imunitetit të deputetes socialiste Belinda Balluku.

Gjatë fjalës së tij në sallën e Kuvendit, Bylykbashi u bëri thirrje deputetëve që të votojnë pro kërkesës së SPAK, duke theksuar se Kuvendi duhet t’i hapë rrugë procedurës për arrestimin e saj.

“Një nga seancat që do të lërë gjurmë për mënyrën se si Kuvendi garanton të drejtën e shqiptarëve për mirëqeverisje. Sot në emër të 5 deputetëve anëtarë të Këshillit të Mandateve do të lexoj një përmbledhje të raportit të opozitës mbi kërkesën e SPAK për rastin Balluku”, u shpreh Bylykbashi.

Ai kujtoi se Kuvendi u vu në lëvizje më 16 dhjetor pas kërkesës së paraqitur nga SPAK, e cila sipas tij shoqërohej me prova dhe relacionin përkatës.

“Kuvendi më 16 dhjetor u vu në lëvizje nga SPAK, ku u kërkua dhënia e autorizimit për arrestimin e Ballukut, kërkesë e shoqëruar me provat e plota dhe relacionin përkatës. Kuvendi duhet të japë autorizimin”, deklaroi deputeti demokrat.