Në muajin e shenjtë të Ramazanit, kryeministri Edi Rama dhe bashkëshortja e tij Linda Rama kanë shtruar mbrëmjen e djeshme një iftar për besimtarët.

Përmes një postimi në rrjetet sociale, kreu i qeverisë ndau një videokartolinë nga atmosfera e mbrëmjes, duke theksuar rëndësinë e bashkimit dhe të ngrohtësisë që sjell kjo traditë gjatë Ramazanit.

“Mirëmëngjes dhe me videokartolinën e mbrëmjes së ngrohtë rreth sofrës së iftarit, ju uroj një ditë të mbarë”, shkroi Rama në postimin e tij.

Gjatë fjalës së mbajtur në këtë aktivitet, kryeministri u shpreh se sofra e iftarit është një moment që bashkon njerëzit pavarësisht besimit, ndërsa theksoi edhe vlerat që përcjell agjërimi.

Sipas tij, agjërimi i mëson njeriut durimin dhe aftësinë për të zbutur vetveten, duke e kthyer këtë periudhë në një kohë reflektimi dhe solidariteti.