Nëna e foshnjës dy muajshe që ndërroi jetë pak ditë më parë në Qendra Spitalore Universitare Nënë Tereza ka hedhur akuza ndaj mjekëve, duke pretenduar se fëmija i saj u nxor para kohe nga spitali.

Vjollca Shkëmbi është shprehur e tronditur për humbjen e foshnjës dhe ka kërkuar ndërhyrjen e autoriteteve për të hetuar rastin. “Nuk ma bën zemra ta fus në dhé… Fajet i kishte shteti, spitali i Tiranës që e nxorri para kohe. Ky ka qenë shkaku që vdiq fëmija im para kohe. Fëmija as nuk hante e as nuk pinte,” është shprehur ajo në një intervistë.

Ajo i ka bërë thirrje policisë dhe institucioneve që të marrin masa ndaj mjekëve në Tiranë dhe në Spitali Rajonal i Korçës. Sipas saj, mjekët në Korçë kishin thënë se foshnja duhej të qëndronte të paktën 10 ditë në spital, por familjes iu dorëzua që ditën e dytë.

“Unë kërkoj nga shteti të marrë masa, nga policia të marrin masa ndaj doktorëve të Tiranës që ma vdiqën fëmijën dhe doktorëve të Korçës që thanë duhet ta mbajnë 10 ditë dhe ditën e dytë na e dhanë,” tha ajo.

Foshnja ishte paraqitur më 13 mars në gjendje të rëndë në pediatrinë e Spitali Rajonal i Korçës. Sipas të dhënave paraprake të hetimit, ajo kishte lindur dy muaj para kohe dhe ishte në gjendje të rëndë shëndetësore edhe për shkak të kequshqyerjes. Hetimet për zbardhjen e plotë të rrethanave vijojnë.