Deputetja e Partia e Lirisë, Erisa Xhixho, është shprehur se procesi i integrimit europian i Shqipërisë po kalon një nga momentet më të vështira.
Përmes një reagimi në rrjetet sociale, Xhixho thekson se Europa nuk është thjesht një treg i përbashkët apo një hapësirë ekonomike, por mbi të gjitha një sistem vlerash që nis nga shteti i së drejtës, barazia para ligjit dhe institucionet demokratike të pavarura.
Sipas saj, votimi në Kuvend për çështjen e imunitetit të zëvendëskryeministres Belinda Balluku ishte një test që, sipas saj, Shqipëria nuk e kaloi.
“Kur Parlamenti vendos të mbrojë pushtetin, të pengojë drejtësinë dhe të kthehet në një quasi gjykatë, praktikisht pengon jo vetëm hetimin e një zyrtari të lartë, por edhe avancimin e procesit të integrimit të vendit”, shprehet Xhixho.
Deputetja e PL-së kritikoi gjithashtu qasjen e kryeministrit Edi Rama dhe presidentit serb Aleksandar Vučić për një integrim të përshpejtuar ekonomik në tregun europian dhe në Zona Schengen, pa përmbushur sipas saj standardet e kërkuara për anëtarësim.
“Historia e zgjerimit të Bashkimi Europian ka treguar se vendet përparojnë drejt anëtarësimit vetëm përmes reformave të thella institucionale, ndërtimit të një drejtësie të pavarur dhe garantimit të demokracisë funksionale”, shton ajo.
Sipas Xhixhos, çdo përpjekje për integrim të përshpejtuar ekonomik pa këto elemente rrezikon të krijojë një status periferik për vendet e rajonit dhe të largojë Shqipërinë nga objektivi për t’u bërë një anëtare e barabartë e Bashkimit Europian.
Në reagimin e saj, ajo thekson se qytetarët shqiptarë kërkojnë drejtësi, meritokraci dhe institucione funksionale, ndërsa paralajmëron se integrimi europian nuk mund të jetë një kompromis i pjesshëm.
