Policia e Kosovës njoftoi më 16 mars se gjatë një operacioni në Prizren është arrestuar një person, ndërsa katër të tjerë janë në kërkim për dyshime lidhur me fajde, detyrim dhe privim të kundërligjshëm të lirisë.

Sipas autoriteteve, pesë të dyshuarit dyshohet se kanë detyruar një viktimë të paguajë shuma të ndryshme parash si interes për fajde, duke përdorur forma të ndryshme presioni dhe dhune. Viktimës i është shkaktuar dëm i vlerësuar rreth 700.000 euro, ndërsa të dyshuarit dyshohet se kanë kërkuar edhe rreth 450.000 euro shtesë për interesin e fajdesë.

Gjatë operacionit u kontrolluan pesë lokacione, ndërsa i arrestuari iu shqiptua masa e ndalimit prej 48 orësh. Autoritetet kanë deklaruar se do të vazhdojnë operacionet kundër rasteve të fajdesë.

Vitin e kaluar, Prokuroria Themelore në Prizren ngriti aktakuzë ndaj gjashtë personave për fajde, të cilët dyshoheshin se kishin përfituar 1.4 milion euro dhe 21 banesa e lokale afariste.

Sipas Kodit Penal të Kosovës, personat fajtorë për fajde mund të dënohen me gjobë dhe burgim nga gjashtë muaj deri në pesë vjet, ndërsa në rast të humbjes së mbi 10 mijë eurove dhe përfitimeve të mëdha, dënimi mund të shkojë nga një deri në tetë vjet burgim.