Telefoni i parë i Samsung me palosje të dyfishtë, Galaxy Z TriFold, pritet të ndërpritet rreth tre muaj pas lansimit të tij, sipas një raporti nga Koreja e Jugut, vendi ku kompania ka selinë kryesore. Shitjet vendase të pajisjes pritet të përfundojnë më 17 mars, transmeton Telegrafi.

Galaxy Z TriFold ka qenë i njohur për disponueshmërinë e kufizuar, pasi Samsung e prodhoi vetëm në sasi tepër të vogla. Njësi të kufizuara ishin në dispozicion dhe u shitën menjëherë, duke krijuar një atmosferë ekskluziviteti, por edhe konfuzioni mes konsumatorëve.

Në Shtetet e Bashkuara, pajisja mbetet e disponueshme, por vetëm derisa të shitet vëllimi aktual i prodhimit, i cili supozohet të jetë i ulët. Ekspertët këshillojnë ata që janë të interesuar ta blejnë tani, para se Samsung ta ndalojë zyrtarisht edhe atje.

Analistët dhe përdoruesit e teknologjisë e kanë cilësuar lansimin e Galaxy Z TriFold si të çuditshëm dhe pothuajse eksperimental, duke krahasuar sasinë e kufizuar dhe ndërprerjen e shpejtë të shitjeve me një “seri prototipi”. Shumë shpresojnë që në të ardhmen të vijë një Galaxy Z TriFold 2, i cili mund të trajtohet si një produkt i plotë dhe jo si një test i kufizuar prodhimi.

Ky zhvillim vë në pah sfidat e kompanive teknologjike në balancimin e inovacionit dhe disponueshmërisë, sidomos kur bëhet fjalë për pajisje me dizajn eksperimental si modelet me palosje të dyfishtë.