Një tentativë vjedhjeje është regjistruar gjatë orëve të natës në një argjendari në lagjen nr. 3 të Pogradec.

Sipas burimeve, dy persona të maskuar kanë tentuar të hapin me forcë qepenin e biznesit, duke arritur ta ngrejnë aq sa për t’u futur brenda. Ata kanë thyer xhamin e derës kryesore, por në momentin kur po hynin në ambient, kanë vënë re afrimin e një patrulle policie dhe janë larguar menjëherë nga vendi i ngjarjes.

Ngjarja ka ndodhur në rrugën “Kajo Karafili”, një zonë e frekuentuar me dhjetëra biznese dhe argjendari. Policia ka nisur kërkimet për identifikimin e autorëve dhe ka sekuestruar pamjet e kamerave të sigurisë në zonë.

Pritet një njoftim zyrtar nga autoritetet për zbardhjen e plotë të kësaj tentative grabitjeje.