Kryeministri izraelit Benjamin Netanyahu deklaroi se konflikti me Iranin mund të marrë fund më shpejt nga sa parashikon opinioni ndërkombëtar, duke theksuar se Izraeli ka dobësuar ndjeshëm kapacitetet ushtarake dhe bërthamore të Teheranit.

Gjatë një konference për shtyp, Netanyahu u shpreh se Irani nuk ka më aftësi për pasurimin e uraniumit dhe ndërtimin e raketave balistike. Sipas tij, operacionet ushtarake izraelite kanë shkatërruar një pjesë të madhe të infrastrukturës kritike, ndërsa sulmet po vijojnë ndaj fabrikave që prodhojnë komponentë për armë.

Ai theksoi se Izraeli synon të “çojë në hi” kapacitetet ushtarake të Iranit, duke shtuar se vendi i tij është më i fortë se kurrë në rajon. Në të njëjtën kohë, Netanyahu nënvizoi se brenda Iranit ekziston një tension i madh politik dhe pasiguri mbi drejtimin e regjimit.

Kryeministri izraelit paralajmëroi se sulmet ndaj figurave të larta iraniane do të vijojnë, duke shtuar se ndryshimet në strukturat drejtuese të Iranit do të jenë “jetëshkurtra”.

Në fund, ai deklaroi se rrëzimi i regjimit iranian mbetet në dorën e vetë popullit, por se Izraeli po krijon kushtet për një zhvillim të tillë, duke dobësuar vazhdimisht strukturat e pushtetit në Teheran.