Një 21-vjeçar ka rënë në prangat e policisë në Shkodër, në kuadër të operacionit të koduar “Grudë e Re”, pasi dyshohet se ka ndihmuar një person të përfshirë në një konflikt me armë zjarri.

Sipas njoftimit zyrtar, specialistët për Hetimin e Krimeve të Rënda, në bashkëpunim me Forcën e Posaçme “Shqiponja”, kanë bërë të mundur kapjen e shtetasit K. F., 21 vjeç, banues në fshatin Grudë e Re, i shpallur më herët në kërkim.

Prokuroria pranë Gjykatës së Shkallës së Parë të Juridiksionit të Përgjithshëm Shkodër kishte lëshuar urdhër ndalimi ndaj tij për veprën penale “Përkrahja e autorit të krimit”.

Nga hetimet rezulton se më 16 janar 2026, i riu dyshohet se ka transportuar me automjet shtetasin E. K., i cili u përfshi në një konflikt për motive të dobëta me shtetasin A. M., në vendin e quajtur “Kryqëzimi i Vinotekës”, ku dyshohet se është përdorur armë zjarri, fatmirësisht pa pasoja në njerëz.

Materialet procedurale i janë referuar Prokurorisë për vijimin e veprimeve hetimore.