TIRANË – Kreu i Partisë Demokratike, Sali Berisha, ka reaguar pas rritjes së fundit të çmimeve të karburanteve, duke bërë thirrje për masa urgjente për të lehtësuar koston e jetesës për qytetarët.

“Nafta ka arritur 214 lekë për litër, dhe kjo është e papranueshme për familjet shqiptare”, tha Berisha, duke shtuar se opozita ka përgatitur një draft me masa konkrete për uljen e çmimeve.

Sipas tij, propozimet përfshijnë përgjysmimin e taksës së qarkullimit dhe rishikimin e akcizës mbi karburantet. Ai theksoi gjithashtu nevojën për aplikimin e një sistemi fiskal të ngjashëm me atë të Kosovës dhe Maqedonisë së Veriut.

“Kemi përgatitur një draft me të cilin kërkojmë përgjysmim të taksës së qarkullimit dhe lëvizjen e akcizës. Do të kërkojmë të vendoset sistemi fiskal që ekziston në Kosovë dhe Maqedoni”, u shpreh Berisha.

Deklarata e tij vjen ndërsa qytetarët përballen me rritje të ndjeshme të shpenzimeve për karburant dhe transport, duke nxitur debat për politikat energjetike dhe fiskale të qeverisë.