Tel Aviv, 22 mars – Forcat Mbrojtëse të Izraelit (IDF) kanë publikuar një hartë në rrjetet sociale, ku pretendojnë se paraqitet rrezja e veprimit të raketave balistike iraniane, duke ngritur shqetësime për një kërcënim që shtrihet përtej Lindjes së Mesme.

Sipas IDF, në hartë janë shënuar distanca nga 300 deri në 4,000 kilometra, ku kufiri maksimal arrin deri pranë qyteteve evropiane si Londra.

“Regjimi terrorist iranian lëshoi një raketë me rreze të gjatë veprimi të aftë të arrijë një distancë prej 4,000 km për herë të parë që nga fillimi i Operacionit ‘Luani që Rri’,” thuhet në deklaratën e ushtrisë izraelite.

IDF shton se gjatë operacionit të zhvilluar në qershor 2025, u zbulua se Irani synon të zhvillojë raketa me këtë rreze veprimi, të cilat “përbëjnë një kërcënim për dhjetëra vende në Evropë, Azi dhe Afrikë”.

“Kemi folur, dhe tani është e qartë, për raketa që mund të arrijnë Londrën, Parisin ose Berlinin,” theksohet më tej në deklaratë. “Regjimi terrorist iranian ka kryer sulme ndaj 12 vendeve në rajon dhe po zhvillon një aftësi që përbën një kërcënim shumë më të gjerë.”

Nga ana tjetër, autoritetet iraniane i kanë mohuar këto pretendime, duke hedhur poshtë akuzat për zhvillimin e raketave me rreze të tillë veprimi.

Publikimi i hartës vjen në një moment tensionesh të larta në rajon, ndërsa deklaratat e fundit pritet të shtojnë debatet mbi sigurinë ndërkombëtare dhe balancat ushtarake.