Tiranë, 23 mars – Sekretari i Përgjithshëm i Partia Socialiste, Blendi Klosi, ka komentuar zhvillimet e fundit në Asamblenë e socialistëve, duke minimizuar rëndësinë e ndryshimeve në drejtimin politik.

Klosi hodhi poshtë aludimet për një “shfuqizim” të Elisa Spiropali, pas riorganizimit të bërë nga Edi Rama, i cili e zhvendosi atë nga bashkëdrejtimi politik i Tiranës në Njësinë nr. 13.

Duke mos u ndalur te individët, Klosi theksoi se në Partinë Socialiste nuk ka vend për interpretime mediatike të lëvizjeve të brendshme. “Nuk ka lajm në lëvizjet e PS. Të gjithë jemi aty për të dhënë kontributin tonë, në role të ndryshme,” u shpreh ai.

Ai shtoi se fokusi i socialistëve mbetet te performanca në qarqe të ndryshme, duke përmendur si shembull rritjen në Shkodër dhe rezultatet më të dobëta në Pukë, çka sipas tij kërkon më shumë përqendrim organizativ.

Sipas Klosit, çdo anëtar i PS-së, pavarësisht pozicionit, është pjesë e suksesit të forcës politike. “Çdo socialist i thjeshtë është kontributor i madh i fitores… për sa kohë i shërbejmë PS dhe Shqipërisë,” deklaroi ai.