PONTEVEDRA – Prokuroria e Gjykatës Provinciale të Pontevedrës ka kërkuar 25 vite burg për Florian Rama, i dyshuar për vrasjen me paramendim të 20-vjeçarit Soufian Mrahë në vitin 2019.

Ngjarja ndodhi në orët e para të mëngjesit jashtë një lokali në zonën e Salceda de Caselas, ku pas një debati të shkurtër, situata u përshkallëzua në dhunë fizike. Sipas hetimeve, i akuzuari dyshohet ta ketë goditur viktimën disa herë me thikë. Pavarësisht përpjekjeve të tij për t’u larguar, Soufian Mrahë humbi jetën nga hemorragjia.

Pas krimit, Florian Rama u arratis dhe iu shmang autoriteteve për disa vjet, deri në vitin 2022 kur u identifikua dhe arrestua në Mbretërinë e Bashkuar. Më pas, ai u ekstradua në Spanjë, ku pritet të zhvillohet procesi gjyqësor.

Prokuroria kërkon që, nëse shpallet fajtor, Rama të vuajë dënimin në Spanjë, të paguajë dëmshpërblim prej rreth 300 mijë eurosh për familjen e viktimës, dhe të dëbohet për 10 vite pas përfundimit të burgimit.

Procesi pritet të nisë me përzgjedhjen e jurisë dhe më pas me dëshmitë e para nga palët. Hetimet dhe dëshmitë që do të prezantohen në gjykatë pritet të hedhin më shumë dritë mbi rrethanat e krimit dhe përgjegjësinë e të akuzuarit.