Kombëtarja shqiptare do të udhëtojë drejt Varshavës për ndeshjen e playoff-it kundër Polonisë, me ëndrrën për të siguruar një biletë për në Botërorin 2026 në SHBA, Kanada dhe Meksikë.

Trajneri polak Jan Urban, në një konferencë për shtyp, vlerësoi skuadrën shqiptare për potencialin dhe stabilitetin që ka arritur me kalimin e kohës. “Shqipëria është një skuadër me shumë potencial. Mendoj se ky potencial është akoma më i madh nga ai që ka pasur më parë, kjo edhe falë stabilitetit të saj. Debutimi i Sylvinhis në 2023 ka dhënë kontributin e vet, dhe kjo bën që skuadra të jetë shumë e fortë,” tha Urban.

Ai shtoi se Polonia duhet të shfrytëzojë faktorin fushë për të fituar. “Ne kemi avantazhin e fushës tonë dhe duhet ta përdorim këtë. Shqipëria ka një mentalitet më mbrojtës dhe shumë lojtarë luajnë në kampionatin italian, duke pësuar pak gola, por shpesh kjo e penalizon në lojën sulmuese,” përfundoi trajneri polak.

Ndeshja pritet të jetë një duel i fortë strategjik, ku kombëtarja shqiptare synon të shfrytëzojë eksperiencën dhe disiplinën për të surprizuar rivalin.