Presidenti i SHBA-së, Donald Trump, njoftoi të hënën se ka vendosur të shtyjë çdo sulm ushtarak ndaj rrjetit elektrik të Iranit për pesë ditë, disa orë para skadimit të afatit që kërcënonte përshkallëzim të mëtejshëm të konfliktit. Në një postim në TruthSocial, ai theksoi se kjo shtyrje vjen pas bisedimeve intensive që kanë zhvilluar të dërguari i tij i posaçëm, Steve Witkoff, dhe dhëndri Jared Kushner me zyrtarë iranianë.

“Kemi pasur bisedime shumë, shumë të forta. Do të shohim se ku do të çojnë ato. Kemi pika kryesore të marrëveshjes, pothuajse të gjitha,” tha Trump, duke shtuar se Shtetet e Bashkuara ndodhen “në prag të një mundësie reale për të arritur një marrëveshje”.

Ai nuk zbuloi identitetin e personit me të cilin po negociohet, por theksoi se nuk bëhet fjalë për Udhëheqësin Suprem Ajatollah Mojtaba Khamenei. Sipas tij, janë disa udhëheqës të tjerë iranianë që kanë rol në negociata.

Sipas mediave ndërkombëtare, Turqia, Egjipti dhe Pakistani kanë ndërmjetësuar bisedimet, ndërsa ministri i jashtëm iranian Abbas Araqchi ka konfirmuar iniciativa për uljen e tensioneve, duke kërkuar që Uashingtoni të marrë pjesë drejtpërdrejt në dialog.

Kjo vendimmarrje vjen pas paralajmërimeve të Trump të së shtunës për shkatërrimin e termocentraleve iraniane nëse Teherani nuk do të lejonte qarkullimin e anijeve në Ngushticën e Hormuzit brenda 48 orëve. Me këtë shtyrje, situata mbetet e ndjeshme, ndërsa diplomacia po përpiqet të shmangë një konflikt të hapur.