Një ngjarje e rëndë që ndodhi mbrëmjen e 22 marsit në fshatin Majac të Podujevës ka lënë pas tre viktima dhe ka tronditur komunitetin lokal. Sipas familjarëve, incidenti filloi si pasojë e një mosmarrëveshjeje mes Ardita Gashit, 31 vjeç, dhe Ilaz Brahimit, 45 vjeç nga Obiliqi.

Njëri nga familjarët, i cili preferoi të mbetet anonim, ka treguar për Klan Kosova se familja nuk kishte konflikte të dukshme me askënd dhe nuk ishte e vetëdijshme për marrëdhënien që Ardita kishte me Ilazin. Ai sqaroi se ngjarja ndodhi papritur dhe në mënyrë të dhunshme:

“Pasi qëlloi atë djalin, ajo shkoi tek nusja e xhaxhait. Ajo ishte bashkë me nusen e djalit dhe tre fëmijët. Ardita iu tha të dilnin jashtë sepse kishte diçka për të biseduar me nusen e xhaxhait. Sapo dolën, dëgjuam të shtëna. Ne ikëm menjëherë, por ajo u mbyll në dhomën e fëmijëve. Kur vëllai tentoi të hynte, ajo drejtoi armën ndaj vetes dhe i tha ‘largohu, se do të të vras edhe ty’”, tregoi familjari.

Ai shtoi se arma e përdorur ishte një pistoletë, duke mohuar pretendimet se ishte përdorur një armë automatike.

Pas incidentit, Ilaz Brahimi humbi jetën në vend, ndërsa një tjetër pjesëtar i familjes, Miradije Gashi, u plagos rëndë dhe ndërroi jetë mëngjesin e së hënës gjatë trajtimit në Qendrën Klinike Universitare të Kosovës (QKUK). Ardita Gashi u dërgua gjithashtu në QKUK në gjendje kritike pas vetëplagosjes, por nuk mundi të mbijetonte.

Zëdhënësja e Prokurorisë Themelore në Prishtinë, Kaltrina Shala, deklaroi se ngjarja kishte nisur nga një mosmarrëveshje mes dy personave dhe hetimet vazhdojnë për të sqaruar rrethanat dhe motivet e kësaj tragjedie familjare.

Komuniteti i Majacit mbetet i tronditur nga kjo ngjarje, ndërsa autoritetet po vazhdojnë me hetimet intensive për të kuptuar plotësisht dinamikën e ngjarjes dhe shkaqet që çuan deri te humbja e jetës së tre personave.